似乎成个星期没悠闲地上网，搞到心挂挂。我忙当然算一个原因，不过有电脑既人忙就更加确切。鬼叫自己没电脑，要问人借咩。今日终于等来呢个机会可以自己慢慢上网周围逛下了。发觉现代人果然已经深深地依赖上网络呢个东西了，连我呢种人都……

首先恭喜腊肠同学荣或省电子设计大赛一等奖（大概啦，唔记得个名了），顺利保研，普天同庆，万民称道~又一个有作为过我，哎，我命苦啊。

今个星期最头痛当数网络问题，唔知点解竟然连百度都可以上唔到，更加唔好讲个烂鬼gmail了。一日两日都算啦，竟然长期性罢工，damn!严重影响工作效率至于更加增加坐我电话费既支出，今个月短信再次提前几日超标，电话费就更加成问题了。穷啊……

另外不知为何似乎自己感情生活最近成为城中热点，无论班入边定武协似乎都唔少人想逗我封媒人利是。而自己竟然好积极地将自己惊天地泣鬼神听者伤心闻者流泪行过路过执到都喊三声既感情故事好声请并茂举重若轻笑中有泪地和盘托出（其实不过三两句），果真“念天地之幽幽，独怅然而泪下”啊~~不过在此奉劝热心人士，你地收皮啦，没机噶啦。我命犯天煞孤星，注定孤独终老（一阵阴风吹过……）

今日例会竟然准备好耐都没暴走成功，唔通我真系已经唔识发嬲，变成好好先生？

oh my god!要回复血性，做嗜血男！！

寻晚御驾亲征，同东方坐车"fing"左个半钟先到左传说中既嘉定校区。其实好早之前就想过来了，不过一直拖到而家，应该都有年几了，切合我风格，漏否咯。一路黑嘛嘛么都唔知，净觉得摆左好多个pose，八月十五一边麻左就换一换姿势，落车时就双脚弹琵琶。除左见到1，周街都系灯，但又没眼灯照得清2，好多建筑华就华，唔知实唔实之外同济既嘉定校区实在没其他感觉俾到我。而且仲有好多工地，荒无人烟……

等我今日再亲身视察一番啦。星期日先走。

听日又到我生日了，实在已经唔想过，因为已经觉得自己好老了，如果可以，后生D好D。22岁，对我大部分朋友来讲都已经系好忙，四围腾稳工或者考研，反正好似我甘一无所有无所事事游手好闲日日好乖地准时去课室然后“钓鱼”过日神既我谂都应该屈指可数了。想起人地将将成为一个生产者，成为社会既栋梁，而我……唉，高不成低不就，么事都与我无关，清虚到果如魂游太空，真系可以去“抱明月以遨游”了。如果世界上 突然间少左个我，应该都唔会有太大既反应，歌仔有得唱，“屎，你系一笃屎，命比蚁便宜”~~而家想来，似乎呢种状态正系自己当初好梦寐以求既野,呜呼哀哉……

当然个人大个 左了，唔会再好似以前甘傻，无所事事去守夜等12点啦，反正又唔似人地多friend既人甘收到短信轰炸，生日对我来讲已经完全没任何一点意义了，除左又老一岁之外。何况听日由朝到黑总共10节课，内科外科外科见习夜晚艺术摄影之后仲有会要开，想好似以前甘稳个时间静静地坐下都应该唔得，悲哀。QQ既个人资料又要改了……

开学已经五个星期了，好开心地感觉所有事情似乎都慢慢步入正轨，无论系学习，学生会工作抑或武协。

首先武协，十一长假之后已经有三次了。似乎呢几次反应同自己表现都几唔错，虽然几个月没拉韧带已经严重退化，希望可以有动力继续折磨自己啦。其次学习，第一次有时间睇借左两三个星期既医学英语，发现虽然好花时间，不过自从大三没英语课没机会静下心来睇英文之后第一次有翻果种好enjoy English reading既感觉，其他专业课都叫做有时间去review。最后应该亦都系最开心既系我地ICCD（international comunication and cooperation department）终于叫做开张大吉。招新结束，language partner又开始正式启动。同好多个外国人见过面，反响好唔错。而家终于明白点解老袁会如此有主人感了。自己从今个学期开始差唔多从头做起，一手一脚“凑大”个部门，果然好有成就感。当然自己觉得唔会好似老袁甘高高在上，始终自己已经好唔同左，起码从超人口中得知既自己同以前比啦。提起超人就……哎……原本今个星期应该讲基本都好顺，就系呢条友搅局。好地地竟然话要退出。老实讲，呢个小妹妹一直都系我地部门既开心果，好难得系一个可以同我斗到上天入地翻江倒海斗转星移既靓妹。可能系我没把握好几个手下既人事关系伤到距积极性啦，哎……

呢个小妹妹话我space写既野没深度，又话我个人好恶搞，话想象唔到我好凶狠既样……如果俾距知道我中学时既“光辉往绩”唔知又会作何感想呢？可能自己真系变左，变得老油条啦。老实讲，如果而家要我呕d深沉既野出来确实唔易，以前d忧国忧民早就忧晒去大西北了。深沉果然已经俾我绑个1000KG既大哑铃深深地沉左落阿特兰蒂斯了。人生得意须尽欢，莫使金樽空对月啊嘛（好耐没用过如此高深既说话了）

寻晚八月十五中秋，可以算大学四年过得最没意义既一个中秋节了。大一时同同班同学share好难食既月饼，仲会去睇人头涌涌既晚会；大二时黄思行呢个最令我感激既师兄介绍左一班广东师兄师姐过我识，大家一齐系操场赏月吹水，可以讲系大学几年中最开心既一日之一了；大三时既中秋虽然都有聚会，不过好多主要人物都已经毕业，圈子虽然有新人加入，但已然显得有D凋零。到今年，干脆没人再有呢种“古道心肠”组织活动。唉，时过境迁啊……

除左同宿舍几丁友夜晚去小山东食左餐饭之外我竟然成日没出过宿舍一步。打机打到甚至中午饭都没食。国庆TOTAL放8日半假，到而家为止我只去图书馆睇过半日书。再想到翻学前立下既雄心壮志……

 

 

P.S.终于记得将暑假时游记贴上来了

6月30号：上午系阿挽屋企好无聊地耗左几个钟，中午先坐车到漳州，部烂鬼车仲话高档，岩馋就算啦，仲要中途坏车，足足搞左大半个钟，4点先到漳州市区，净系觉得好残旧，好细，大概市桥花都都好过。落左车仲要搭7蚊人力三轮到另一个客运中心，正好赶上5：30末班车。车一路抛到7：30先到同刘志艺约定果度，路上果种艰辛就无谓多讲，不过最痛苦都系同D阿姨沟通唔到，鸡同鸭讲……好在有人伸出“圆”手，果然在家靠父母，出外靠朋友。见到刘志艺都仲要坐车。距表哥开住部行起身快散既toyota狂飙翻距屋企，都已经8点了好偏僻既地方，好热情既屋企人……
夜晚睇波睇到好夜，竟然无意中第一次见到银河，charming……
7月1号：上午训到好迟，起身周村走，好新鲜。中午食完饭又训，傍晚去西滩游水，俾块礁石上边附住既蚝壳割到损手烂脚，好伤……夜晚再次行到东滩听浪，晒月光，除左身边没女人之外，好迷人既环境，perfect……
挨夜睇完England再次悲情地被淘汰，心碎……果刻真有想喊既冲动。从98年睇完England壮烈地被Argentina淘汰开始中意，到而家8年了，每次都会令我失望。8年前系Beckham,今次系Rooney。可能好多人中意England系因为有靓仔，而我就偏偏就中意距果种斗士既悲壮感觉。可能正因为每次都会惨烈地告别先至令我中意距啦。同我自己D feeling夹？苦笑……
7月2号：一早起身出海喂鲍鱼，体验渔民耕海既辛苦。其实我都没做过几多野，已经觉得好难挨了。下午训到5点几，去半岛尽头灯塔采风，顺住向海既一面向下爬行，足足系45至60度既光滑岩石，好多地方都要手脚并用，终于体会到点解话“上山容易下山难”。
当然，中午受到风话巴西被淘汰令我剩低既比赛失去最后一点兴趣，没一支球队有好感……
7月3号：休息，没么地方去，挨晚去左东滩影相，然后顺住海滩走左大半个来回，执左一大堆贝壳同鹅卵石，听住涛声阵阵真系觉得好舒服，成个人都好惹relax。夜晚俾蚊咬醒，又出去望住银河发呆……
7月4号：劳累既一日。一早起身坐舢板仔去东山岛，就系建国初东山战役既地方。见识到大海既浪，好玩过海盗船，不过坐得耐加上见到离有陆地既地方越来越远个心都会嘀起身嘎。上岸后为左逃票走左一段好恐怖既滩石路。今日终于似去旅行而唔系去人地屋企痴饮痴食啦（除左依然老拖出动~~）。见到好出名既风动石同其他好多野。之后又到东山县城市场买左近两旧水既干货，差d破产。学识鱿鱼分内外海，内海既特别香，闻到阵香味就即刻俾吸引住了。下午翻到刘志艺屋企又学住系屋后既阴影下睇书，一口气睇完半本《兄弟》，发现已经学识当地人果种休闲，可以静下心来，等时间慢慢流逝而唔一定要去做d乜。5点几又去游左大半个钟水，搞到食饭时发觉已经筋疲力尽了。好简单既生活

7月5号：抓紧最后一日，要做多D事。凌晨4：30起身一个人摸黑去东滩睇日出。一路俾狗吠，去到沙滩边等日出时又差D俾蚊抬走我。anyway，太阳出来果一刻真系好靓，咩都补翻晒，好正~~之后又跟出海。今次去将大部分鲍鱼清仓，自己没做几耐只脚忽然好痕，被怀疑过敏，于是只能够系隔离同只dog dog玩。翻来之后又斋训足成个下午。夜晚饭食到一半时又赶去西滩想影sunset。点知天公不作美，影左几张之后就影唔落去，实在大失所望。好夜下先去刘志艺表哥度用电脑review翻D相，发现4号影既sunset反而好唔错，几有feel

7月6号：一早起身知道法国赢左讨厌既葡萄牙，开心死。睇完重播之后刘志艺老窦搭我去隔离村坐车，好顺利地就到杜浔，转车到左厦门。至于系厦门既日记就唔想写了，因为个人觉得留低唔少遗憾，厦门实在太靓啦。所以有生之年实在要再去一次以聊我胸怀啊

两日志愿者做落来一个词，好辛苦……虽然话实际上我地没么做，不过成日都得个企，简直要担心自己会唔会有疲劳性骨折……

老实讲，比赛门票其实好贵下，听讲楼顶200，有顶座位要480。所以其实我地应该讲几着数了。而且确实应该讲增长左唔少见识，见到比赛用特登改过既专用赛车，见到d有钱人自己开过来既靓车，过足眼瘾。可以讲呢个应该都算系两日来最大既收获了，为确实呢个“志愿者”工作过程中没么学到。主办方自己都没近似既经验，管理混乱不堪。唔怕大胆讲句，要我来组织肯定好过一千倍。而且最最令人激气既系招志愿者时原本网上帖写50/日既。点知29号去培训时又改口变成50/两日。我不明底细就甘俾人昆左了。其实如果开头就讲50/两日我都好可能依然会选择去做，不过距呢种分明带奸商做法既行为就令我好不齿。

anyway,总算稍微叫有少少意义啦呢个假期。

今晚又收到cl短信，实在搞到好尴尬。然后又想到好多……感情呢样野似乎越来越同我没缘。连自己都唔敢肯定系唔系仲系度守紧果个两年之约。虽然连人地究竟当初系唔系随口讲句而家仲记唔记得都系个问题。而而家只不过先至一年几……所以决定唔再想，无欲无求，继续混……

P.S.有赛车当然有赛车女郎啦。原本都好期待嘎，不过等到行近细睇，呢班上海女生就实在……终于切身深刻体会周敦颐周生果句“可远观而不可亵玩焉”系点解了~~~

机缘际遇，注定我呢个假期同赛车有缘。竟然俾我梦想成真，系舒麦加（广州话应该系咁译）最后一次上海F1比赛亲临现场。，仲要系唔使钱果只～～god!Schumi仲要连过两部雷诺拿到冠军追平积分！！

原本以为妮妮没办法搞到我入去就没计啦，有唔会有米到用几旧水去睇场车。点知同剑桥睇完排位赛之后距竟然话我知底里佳有成5张团委内部票，于是乎即刻飞去学生会问底里佳要。眼见美梦成真果一刻真系喜悦之情难以形容～～

不过都可以讲好事多磨了。首先之前一日排位赛因为落雨法拉利俾烂鬼日本仔野bridgestone拖累得Schumi拿到第六，根据本人几年来系上海嘅经验正赛当日肯定唔会有得好天，所以一早就打定输数先了。等到中午12点几左右大雨倾盆而下时唔单止虽然担遮都差唔多淋到成身湿晒，更加淋到我心都凉晒，如此天气，加上排位赛成绩，法拉利唔输都难啦。已经算紧如果Alonso拿冠军又可以抛开Schumi几多分，剩低两站平均每站要追几多分先够。 发车时虽然雨已经停左，不过依然如赛前所料，Fisi压住后面嘅车，Alonso喺前面狂奔同后边越拉越开。不过好意外，因为第一次入站换胎有误，Alonso越开越慢，终于令Schumi有机会超过两部雷诺，成功夺冠！！！my san Schumi!!

第一次现场睇F1，喺赛场外边用10蚊鸡买咗对耳塞，曾经以为会好废，不过正式开赛时先知道原来实在物有所值，唔喺好可能耳仔聋都似。不过当然提醒大家以后如果有机会去，都喺预先去超市用两蚊鸡买定一对先，唔使去到做水鱼。

今晚要早d休息，听日又要去做漂移赛志愿者了：）